Bases

A Asociación Marearte convoca o concurso galego de audiovisual non profesional “OlloBoi 2014” que se rexerá polas seguintes

BASES

1. Poderá participar calquera persoa ou grupo de persoas nacidas ou residentes en Galicia, do eido escolar (Primaria, Secundaria, Universitaria e Escolas Audiovisuais) ou do ámbito extraescolar afeccionado (sen produción profesional).

2. Os participantes menores de 18 anos farano baixo a responsabilidade do seu titor legal. Se os traballos veñen dun centro educativo, deberá haber unha persoa coordinadora (para actuar de interlocutora con Marearte).

3. Aceptaranse traballos de vídeo-creación (ficción ou documental) de duración preferentemente non superior ós 20 minutos, que deberán estar aloxados nun servidor web: Vimeo, Youtube, DailyMotion…

4. A temática e lingua dos traballos será libre, aínda que se valorará o uso do idioma galego, a sensibilidade medioambiental e social e o respecto ós dereitos dos animais.

5. Aceptaranse traballos realizados nos últimos 3 anos sempre que non se presentaran en edicións anteriores do concurso.

6. As imaxes e audios dos traballos deberán ser propiedade dos autores do vídeo, quen consenten na divulgación do material na rede, sempre co recoñecemento da súa autoría e dos seus dereitos (recoméndase que os rexistren baixo licenza Creative Commons).

7. O tribunal estará constituído polos organizadores do evento.

PARTICIPACIÓN: Vías e prazos

1. Os traballos deberán pendurarse nun portal web antes do venres 24 de abril (incluído), indicando no formulario de inscrición (accesible desde olloboi.com) a dirección (URL) onde están albergados.

FALLO DO TRIBUNAL e PREMIOS

1. Os vídeos de todos os participantes estarán enlazados dende o día 25 de abril no sitio web olloboi.com dende onde se poderá acceder a un formulario para votar online ata o venres 9 de maio.

2. Establécense OITO categorías con cadanseu premio, a contía dos cales se determinará en función das colaboracións e patrocinio acadados:

   1. Olloboi Cómico: o máis gracioso e simpático, o que máis nos fixo rir, o que é para partirse, a mellor comedia

   2. Olloboi Peleón: o máis comprometido, combativo, reivindicativo, social, con máis valores, o que máis e mellor denuncia, o máis solidario

   3. Olloboi Fotoxénico: o máis estético, con mellor imaxe, fotografía, efectos, o máis bonito de ver, con máis estilo, con máis arte, o máis visual

   4. Olloboi DJ: o máis musical, rítmico, armonioso, á mellor banda sonora, música orixinal, efectos de son e ambiente, o mellor vídeo musical

   5. Olloboi Orixinal: á mellor historia, narración, relato, creación inédita, o mellor guión, a mellor ficción

   6. Olloboi na Escola: a mellor experiencia académica, actividade didáctica e educativa, o mellor traballo nun centro educativo, o máis pedagóxico e instrutivo

   7. Olloboi Online: o máis votado, o máis valorado polos espectadores, o que xera máis afección, o máis seguido, o premio do público

   8. Olloboi Zamburrioi: o mellor traballo, o máis completo, o vídeo que máis mola, o máis redondo, o de máis calidade, o premio Olloboi

3. Non se descarta a inclusión de novas categorías de premios en función dos posibles patrocinios conseguidos

4. A Organización resérvase o dereito a declarar deserta unha ou varias das categorías
5. A data e lugar de entrega de premios será na Gala OlloBoi 2014 que terá lugar o venres 23 de maio na Casa de Cultura de Boiro.